Huck Finn 32

De Phelps es u mikro cotona kulti-lo; plus-co panto tali topo feno habe un iso-vista. Mi kine a poste, e skende trans fragma, e sti kine a kuko-ka. Kron mi es hemi a la, mono kanis sti sta se, po an un hetero kanis, e kine anti mi; po-co mi sura sto kine, e skope a mu, e sta minus moti. Un Afrika fe-dulo sti drom ex kuko-ka ko plati-ru in manu, tem voci: “Ab ci!” po-co u kaukasi gina veni ex domi a la, qi habe 45 a 50 anua. Plus-co po fe veni bi mikro kaukasi infanti. Fe tali labi-ridi, fe proxi ne pote sta, a dice: “Es tu– fini! Qe?”

Mi dice, pre mi pote puta: “Ja, seniora.”

Fe subito kapti mi, e forti peri-braki. Fe du dice: “Bi infanti, es tu matri-sibi fili Tom!”

Po na kine i domi, fe sedi mi in sedi-mo, e sedi se epi mikro plati-sedi-mo ante mi, tem tena mi bi manu, e dice: “Na pre atende de tu ma mega de bi di. Qo-ra tena tu?”

“Na pa sti explode u moti-me kilindra.”

“Tali acide! Qe uno-pe gene noku?”

“No, seniora.”

“Tu pa gene un inkontra ko parenta-sibi Silas top via, qe?”

Mi este tali turba, mi ne pote boni audi.

Fe dice: “Anti-co na tali du dice, tem tu ne pa dice a mi mono verba de mi fe-sibi alo de mono ex mu.”

Ben, mi logi: mi habe u no-posi– u forti no-posi. Mi proto aperi u stoma; anti-co fe rapi mi, e sti: mi tako kine po kli, e dice: “An nu kine a ci! Mi akti u joko ad an.”

Mi gene u fo-mikro vista de u-la paleo gentili-an, kron an kine in la. Sra. Phelps dice: “Qe an pa kine a ci?”

Fe sponsa dice: “No.”

“An pa pre debi kine a ci; plus-co tu pa kine ultra an longi via.”

U paleo gentili-an dice: “Mi ne pote puta u ra, qi pa acide ad an.”

Fe tako klina se topo poste de kli, e tira mi ex la. “Es TOM SAWYER!”

Sura, mi proxi kade a pedi-lo! Si mu este hedo, es zero-ra kompara a mi. Mi dice a mu poli ra de auto– mi veri tende– de famili Sawyer.

Mi este qieta topo uno latu e turba topo hetero latu. Mi fu nece habe un inkontra ko Tom Sawyer longi via. Kausa-co mi dice a famili, mi fu kine a viki, tende fero plu fero-va a ci.