U viagia de navi Bounty, ultima mero

U VIAGIA DE NAVI BOUNTY mero 4

Unionida = clam

Tem di meso, plu nadi ki ta proxi navi; mu gene kapti. Panto-ci avi es cirka metri de pusi kolumba. Id gene lisi per mo-okto mero e gene dona per fortuna. Plu andro este mega hedo, kron mu vide; u rostri e plu pedi gene acide a kapitana. Un avi kon osteo e panto-ra gene fago ko pani e aqa homo cefa vora.

Nu, tem mu es epi ma no-ki mari, mu gene rapi ex neo turba: un heli termo gene ta mega; poli mu lose este e kumbe in funda de navi ko non-este stato tem holo di. Mu face vigi se solo proxi vespera tem tenta kapti plu avi.

Kron mana de di bi-okto, u soni de plu sto-aqa-ra pote gene audi ko klari. Mu pa gene u buta Mega Barira Lito-Katena; qi sta longi ma mega mero de orienta kosta de Australia. Po pusi tem, un aperi proxi 300 metra lati gene detekti dia lito-katena, ko-co mu gene duce per forti flu ad-in plu paci aqa; qi kumbe intra Barira.

Pusi-tem, mu gene ta excite; mu pre-tem turba gene no-memo. Plu ne-klari ciano-polio line de cefa landa ko plu leuko mero de foto arena buno pote gene vide in tele. Tem di meso, mu ki epi insula. Mu detekti, plu petro peri id habe u tegu de Ostre e mega Unionida; pe pote gene ko facili tem kata mari. Oligo de mu grega; ge-bali te serca, ki versi ko mega hedo po detekti mega no-sali aqa. U piro gene face per auxi de pusi lekto lenti. Inter plu ra; ge-jekti ad-in kope-navi ex navi Bounty es u pusi kupra vasa. In mixa de Ostre, pani e sui karni, u kuko gene prepara, ko-co panto-pe habe u mega fago.

U di; po mu pa ki epi insula, es meno penta di bi-nona, u celebra de versi de regi Charles II. Ka u kapitana este u doxo; u-ci es relati a mu auto sani e forti, an dona ad id u nomina Insula Versi.

Po oligo di relaxa; qi akti mega te sti vive in panto andro e po kolekti u mega stora de Ostre, mu habe prepara te itera ki avanti. Kron mu proxi sti ki, panto-pe gene u komanda; habe preka. Kron mu ki ad-in navi, cirka bi-ze nudi agrio-pe; panto-pe ko mo longi diplo-akro lance, ki ko dromo e voci a mu. Anti-co plu England-pe ki a mari ko panto tako.

Tem oligo di, mu ki per veli trans homo-laku paci de barira aqa e ultra plu fo agrio landa de kosta Queensland; topo panto projekti-landa e baia habe plu nomina; Cook pa dona a mu pre solo oligo anua e qi dice a na per nomina panto auto stori de frustra e spe. Tem dura ki a boreo, mu ki ultra poli insula e insula line. U viagia a boreo gene termo e ma termo, a-kron meno sixa di tri; tem qi mu ki ultra kapo York; u peninsula, qi es fo idio kausa a-boreo tropi, ko-co mu es itera in norma mari.

A nu, poli mu habe pato malaria. Ci-kron; u kron mo, pusi de vino; mu habe ko se, gene uti. Anti-co u pusi navi dura ki ko koragi e ko navi-pe grega; qi facia habe ta kavita e morta feno, mu habe u feno de fantasma grega tem ki per veli infra piro heli; qi bate ab palidi-ciano e minus-nefo urani epi mari; qi es proxi iso ciano in ma mega bato. Solo u spe; mu fu ki a Timor po pusi tem, feno vigi mu ex stato de dice no-este alo ge-turba somni.

Kron di mo-mo, u kapitana dice; mu pa ki ultra meridie de orienta de Timor. Kron horo tri de seqe mana, mu vide tera. Id es setimana di mo, meno sixa, di mo-tetra, kron mu akti veni a baia Company. Mu gene cepti per panto favo ex plu homi la.

Per u-ci mode, mo ex panto maxi sti-audi viagia; qi pa gene face panto-tem, gene fini. Mu pa gene bali ko solo penta-di stora. Anti-co, per kura puta e forti decide te dona a singu mo andro solo u justi meri; mu pa face per akorda te cepti, kapitana Bligh akti; u-ci dura tem penta-ze di; tem qi mu pa ki proxi 10,000 kilometra.

Pa es plu di; tem qi panto-la andro gene ta duce ex famina; mu dice fo-petitio te gene ma qantita sito–ko-co an nece dice nega. Tem ki ultra plu insula; topo pe posi gene poli sito, an feno habe non-audi oti a mu fo-volu; ki epi tera. An nece dura vive dia nece de sito e dia presa stato e dia no-facili somni homo auto navi-grega. An habe ma perfekti ski de mu risko. Pa es plu di e noktu; tem qi an puta mu loka, tem homi pa tena orto an tem skope plu astro e heli.

Ka-co pa es kapitana Bligh boni navi-tekno e severi puni-mode e justi mode de dona sito e vino a panto-la pato-pe; qi dona a mu u posi; ki a Timor kon holo qantita mu dura vive kon un exklude mo andro; qi pa gene cide per lito ex plu agrio-pe in Tofoa.

The best thing to hit the internet in years - Juno SpeedBand! Surf the web up to FIVE TIMES FASTER! Only $14.95/ month - visit www.juno.com to sign up today!