Mikado 11

[11]

Ko: (Kine a Nanki-Pu.) O, sti-simpati ami, mi veri este penite de tu.

Nank: Grati, ami. Mi este sura; tu este tali.

Ko: Tu logi; mi es minus auxi.

Nank: Mi logi u-ci.

Ko: Mi ne pote puta de ali ma turba ra, de pe lose u game kron ultima kron. Anti-co tu ne fu este u minus de game– tu fu veni a game de mi.

Nank: U-ci es veri gluko ex tu, anti-co u-ci es no-posi.

Ko: Tu habe qo semani?

Nank: Mi ne fu pote bio minus Yum-Yum. Nu-di mi fu akti apo-bali.

Ko: No, no. Sti pardo. Mi ne pote lice u-la.

Nank: Kausa qo?

Ko: Kausa tu habe un akorda de gene morta per manu de Publika Cide-pe po mono meno! Si tu cide se, qo-ra fu acide de mi? Kausa-co mi fu nece gene cide vice tu!

Nank: Sura feno es tali!

(Pu-Ba kine a skeni.)

Ko: Ben, senior Urba Cefa, nu es qo?

Pu: U Mikado ko panto servi-pe veni a civita, e fu es ci po deka minuta.

Ko: U Mikado! An veni tende sti sura; an komanda gene ple! (A Nanki-Pu:) Ben, sti logi. Tu ski; u-ci gene es importa. Un akorda es un akorda, akorda-co tu ne debi sti frustra plu mode de justi per cide se. Iso un honora e gentili andro, tu debi no-famo morta per manu de Publika Cide-pe.

Nank: Kausa-co, veri boni, sti apo mi kefa.

Ko: Qe nu?

Nank: Sura, imedia.

Pu: Per peleki! Peleki!

Ko: Mi boni senior, mi ne es prepara de imedia akti u cide de un andro. Sti logi, mi pa zero-kron cide klu u diptero!

Pu: Anti-co iso Cefa Lega-Cide-pe–

Ko: Mi boni senior, iso Cefa Lega-Cide-pe, mi debi apo an kefa po meno. Mi ne nu es prepara. Mi ne ski u mode. Mi fu gene plu sko. Mi fu proto per u mikro rode zoa e du ergo dia panto zoa, a-kron mi gene u sko de kornu-pe bi. Sti logi, tu ne doxo; iso u simpati homi, mi sio cepti u profesio Cefa Lega-Cide-pe, si mi pa puta; plu debi es simpli no-nece? Mi ne pote cide tu. Mi ne pote cide ali-ra! Mi ne pote cide ali-pe! (Lakrima.)

Nank: Sti logi, mi sti-simpati homi. Panto na nece uno-kron akti plu no-gluko ergo. Seqe-co u-ci es qo? Si mi ne este turba, kausa qo tu nu este? Sti memo; tu debi akti u-ci po brevi alo longi.

Ko: (Subito salta.) Qe debi? Mi doxo, u-ci ne es sura!

Nank: Tu puta qo?

Ko: Tende qo mi debi cide tu, tem grafo u deklara; tu pa gene cide, es iso boni? Ci es poli testi-pe: Cefa Judika-pe, Milita-Navi Cefa, Arme Cefa, Sekretari de plu Intra Negoti, Proto Cefa de Tresora e Polica Cefa.

Nank: Anti-co mu es topo qo?

Ko: Mu es la. Panto mu fu dice jura de u-ci, qe? (A Pu-Ba.)

Pu: Qe mi logi; panto fo-arki ofici-pe na de krati nece sto honesta se, tende face sura tu sekuri?

Ko: Sura tende. Tu fu gene u kako ofere, iso freqe.

Pu: Qe u-ci ofere es imedia valuta, alo kron certa datu?

Ko: Id fu es u negoti de imedia valuta.

Pu: (A latu:) Ben, u-ci fu es u puni. (Voci:) Veri boni. Sti elekti de tu fikti, po-co mi fu dice u testi de id. (A latu:) Amusa! Qe tu amo u-ci, mi famili bombasti?

Nank: Anti-co mi dice a tu; mi bio minus Yum-Yum–

Ko: O, Yum-Yum, Yum-Yum! Ne de Yum-Yum! A ci, bali-pe (a Pu-Ba), sti kine e duce Yum-Yum a ci. (Pu-Ba kine ab skeni.) Prende Yum-Yum, e gene u game ko Yum-Yum. Simpli sti kine ab ci, e zero-kron re-veni. (Pu-Ba ko Yum-Yum kine a skeni.) Ci es fe. Yum-Yum, qe tu habe excesi aktivi?

Yum: Ne excesi.

Ko: Qe tu habe penta libe minuta?

Yum: Ja.

Ko: Kausa-co sti kine ko senior Religio Cefa de civita Titipu. An fu imedia sti game vi.

Yum: Anti-co mi fu gene ankora-bio in-tera–

Ko: Sti-logi. Ne dice plu qestio, anti-co sti un aktivi, mi dice a tu, po-co Nanki-Pu fu sti klari panto-ra.

Nank: Anti-co mono minuta–

Ko: Ne kambio plu planeta! U Mikado nu veni, minus dubi tende sti sura u ski, qe mi pa akti an deklara. Plus-co, si an detekti bio tu, mi fu have mega no-facili de klari ad an; mi pa apo tu kefa. (Nanki-Pu e Yum-Yum, Pu-Ba seqe mu, kine ab skeni.) Forti proxi ad u-la, kausa an nu veni. (Ko-Ko kine ab skeni.)